SIB TW NRUG KEV PUAM TSUAJ

Kev sib tw nrug kev puam tsuaj yog kev sib twv. Kev sib twv yog kev sib ntaus sib tua.

Koj twv kom koj tau hwj chim tab sis koj tsi paub, txuj kev sib twv yuav ua rua koj poob tsim. Kuv twv kom kuv tau ua tug tsaav tab sis kuv tsi paub, txuj kev sib twv yuav ua rua kuv plaag ntshaav.

Kev ua nom ua tswv, peb khaav tas peb sib twv kom yeej yeeb ncuab tab sis yog peb rov sib twv sib tawg tes yeeb ncuab yuav nyob kaaj sab lug tsi muaj nub tuag.

Peb rhawv tau ib txuj kev hab teeb tau ib lub hom phaj tab sis peb ua nyuj sib nraus hab ua dlev sib tug, taag ib sim neej yuav moog tsi txug. Peb teeb tau ib lub hom phaj hab rhawv tau ib txuj kev tab sis yog peb ua dlev sib tug hab ua nyuj sib nraus, taag ib txhis peb yuav moog tsi dlhau.

SIB TW NRUG KEV KOOM TEG

Kev sib tw yog kev nthuav nthuav ci.

Sib tw ua nom ua tswv, kawm ntaub kawm ntawv, hab nrhav noj nrhav haus kuv tsi yeej los ca kuv sawv qhuas koj. Koj tsi yeej los ca koj sawv txhawb kuv. Qhov ntawd txhad yog sib tw raws kev ywj pheej hab kev ncaaj nceeg.

Kuv yeej los koj txhob chim, koj yij meem npaaj tog zoo le thaaj teb koj maam ua lwm cim. Kuv swb los kuv tsi txhob chib nyeej, kuv yij meem npaaj tog lwm tam kuv maam yeej.

Ua neej nyob txhob ntshai lig, yug lub teb chaws txhad zoo le lub paaj teeb tawg ci. Ua neej nyob txhob ntshai taag, yug haiv neeg txhad zoo le lub paaj teeb tawg kaaj.

KEV KOOM TEG NRUG KEV SIB TWV

Sib twv kom yeej tug yeeb ncuab.

Yog koom teg, yuav tau txais kev muaj yeej, yog nyob hum xeeb, yuav tau txais kev thaaj yeeb. Leej hlub leej yau, tug laug tug hluas, los yog quas puj quas yawg, suav dlawg sib tuav teg ua ib phaab tuaj ib tog tua ib tug peb txhad tau txais kev ywj pheej nyob kaaj sab lug.

Ntau tus tuaj ib tog thiaj muaj zog.
Ntau leej tuaj ib sab thiaj muaj cuab kav.

Tsib xwm yog lug ntawm kev thooj xeeb puag xub pwg. Cuab kaav yog lug ntawm kev phooj kev ywg dlaav.