KEV NTSHAW NOJ KHEEJ YOG KEV POOB NTEEG.
KEV NTSHAW NOJ QAAB YOG KEV PLAAG NTSHAAV

Txhob ntshaw kom koj ib leeg tau noj kheej. Yaam qaab yog koj ib leeg noj tab sis teeb meem los yog koj ib leeg ris.

Ib tug ntoo tuaj rua sau ib lub roob sab, yog tsi muaj ntau tug sawv sib txig ua ib koog, roj aav zoo los nwg ib tug tau ntxais, huab cua zoo los nwg ib tug tau laaj tab sis yog naag xub naag cua los nwg ib tug nreg. Zag zoo tes nwg tau nyob tab sis yog zag phem nwg yuav raug nkuj hlo.

Ib leej tuab neeg los ib yaam. Koj yuav txawj ntse hab ua nom ua tswv luj npaum twg los yog koj tsi rub tsi nqug ntau tug sawv nrug koj ua ib paab, yog teb chaws thaaj yeeb tes tsi ua luaj twg, hwj chim yog tsaav, meej mom yog koj ntoo, qhov qaab koj ib leeg noj, nyaj txag koj ib leeg tau siv hab cev zoo los koj ib leeg naav tab sis yog lub teb chaws tsi thaaj yeeb, koj yuav raug poob nteeg hab tug tseev tsim yuav raug plaag ntshaav.

XYEEJ TSAWG TSI XYEEJ COOB

Kev hum xeeb yog kev thaaj yeeb, kev sib paab yog kev caj vaaj.

Ntau tug txhad khov, ntau leej txhad muaj zug. Ntau txhais teg ua rua hauj lwm sib, ntau txhais npaab ua rua hauj lwm tav. Ntau tug thawj coj ua rua lub teb chaws nyob thaaj yeeb. Ntau tug txawj ntse ua rua lub teb chaws vaam meej.

Ua xyoob ib txoog ntoo ib tsob, ua nqaj dlaig tawv ib phob, muaj ntau muaj tsawg los suav dlawg sib faib noj. Muaj zoo muaj phem los suav dlawg sib paab nreg.

Txooj ntoo yuav khov los yuav tsum sawv ua ib ntsug, ib lub teb chaws yuav nyob thaaj yeeb los yuav tsum taag nrho tsoom nom tswv sib puag xub pwg ua hauj lwm le ib tug. Txooj xyoob yuav khov los yuav tsum sawv ua ib nceeg, ib haiv neeg yuav muaj yeej los yuav tsum taag nrho pej xeem huab fwm sib tuav teg ua hauj lwm le ib leeg.