HMONG INTERNATIONAL UNITY LUB HOM PHAJ (ZEEM MUAG)
July 24, 2001

HIU lub hom phaj yog peb nrhav tswv yim txhawb txuj kev hum xeeb xwb. Tug tswv yim peb yuav nrhav ntawd, piv txwv le ib tug ntoo raug kaab noj caag nwg tsi zoo lawm es peb yuav ua le caag txhad paab tau tug ntoo kom rov zoo le qub. Qhov tseeb, yog peb yuav tsum sib paab nrhav tshuaj tua tug kaab kom tuag hab muab chiv rau paab peb txhad cawm tau tug ntoo txhua ceg rov tawg paaj txi txiv le qub.

Yog peb qhwv ib tug ceg coj moog cog xwb, peb yeej cawm tau ceg ntawd tab sis txhua ceg tseem nyob ntawm tug ntoo yuav tuag taag.

Has txug nuj nqes kev cawm paab tug ntoo. Yog peb cawm tau ib tug ceg, nwg tsuas txi txiv txaus ib yig noj xwb tab sis yog peb paab tau tug caag, nwg yuav txi txiv txaus ib zog noj. Thaum peb pum le ntawd lawm, peb xaav le caag? Ca ib yig noj es tseg ib zog lov los ca ib zog kws taag nrho suav dlawg tuab si tau noj? Kuv xaav mas ca peb cawm tug caag es ib zog tau noj taag nrho txhad yog txuj kev zoo.

Peb lub neej los tuab yaam nkaus. Yog peb paab txhawb ib tug, nwg tsuas muaj nqes rua ib yig xwb tab sis yog peb sib paab nrhav tswv yim paab cawm txuj kev hum xeeb, nwg yuav zoo taag nrho haiv Hmoob.

Yog le ntawd, HIU txhad has tas nwg lub hom phaj yog yuav nrhav kom tau tug teeb meem kws ua rua Hmoob lub kua muag poob hab Hmoob raug poob teb poob chaw lug hloov Hmoob lub neej kom txuj kev hum xeeb vaam meej sub Hmoob txhua tug txhad tau txais kev thaaj yeeb, muaj yeej hab vaam meej.

Tsi taag le ntawd, kuv yuav muab Hmoob lub kua muag txhais kom meej saib yog dlaab tsi. Tog Hmoob lub kua muag poob taag los rov poob dlua es ua moog ua lug ua rua Hmoob poob teb poob chaw los vim Hmoob tsi paub tseeb has tas Hmoob yog leej twg le. Yog vim Hmoob muab tug yeeb ncuab tig ua phooj ywg tab sis Hmoob rov lam Hmoob ua yeeb ncuab es sib ntaus sib tua rua tug yeeb ncuab qhuas. Thaum yeeb ncuab qhuas Hmoob mas Hmoob zoo sab heev hab Hmoob fwm tug yeeb ncuab npaum nkaus huab tais tab sis Hmoob lub kua muag tub yuav raug poob los Hmoob tsi paub le. Txhua zag kws Hmoob raug puam tsuaj puav leej yog lug ntawm Hmoob tsi paub Hmoob xwb.

Kuv thov muab cais meej has tas txhua tug tuab neeg kws nyob huv qaab lub npe Hmoob yeej tsi yog yeeb ncuab tab sis yog tim Hmoob tug cwj pwm rov lam Hmoob ua yeeb ncuab kom Hmoob sib tawg xwb.

Ua ntej yuav cawm tau ib tug ntoo kom rov tawg paaj txi txiv, peb yuav tsum muaj zoo tshuaj tua kaab hab muaj zoo chiv rau.

Ua ntej peb yuav cawm tau Hmoob txuj kev hum xeeb, yuav tsum yog peb nreg taug txuj kev txom nyem huv txuj kev ncaaj nceeg. Tsi taag le ntawd, yuav tsum paub qhov tseeb, ua kom yog hab moog ncaaj lub hom phaj tag.