LUG THOOB TSIB HAS TXUG HIU
July 24, 2001

Kuv thov thoob tsib txug ob yaam le huv qaab nuav:

1) Has txug ib tam ib tam ntawm kev xaiv tsaa cov tuav dlej num
huv koom hum Hmong International Unity.
2) Has Txug qhov kuv tsi pum zoo muab lub koom hum nkaag ua
koom hum raug cai.

Ob yaam ntawd, kuv tsi pum zoo vim lub koom hum nuav yog ib lub koom hum tshwj xeeb. HIU lub hom phaj tsi zoo le lwm hom koom hum. Qhov nwg xaav tau (ntshaw) yog kev hum xeeb xwb. Nwg ntseeg tas yog Hmoob nyob hum xeeb tes txuj kev vaam meej nyag yeej txawj tsim nyag lawm. HIU paub tseeb tas Hmoob txuj kev poob qaab yog kev sib tawg xwb.

Txuj kev yuav muab Hmoob hum xeeb tes yog rhu Hmoob tawm huv txuj kev sib tawg lug. Tej yaam tshwj xeeb zoo le nuav tsi yog tseem fwv hauj lwm luas yeej tsi paab yug. Yog peb ua raws le txuj kev ua koom hum, tseem fwv yuav muab tug txheej txheem koom hum tuav peb ib yaam le lwm lub. Yog peb tsi paab peb, luas tsi laam paab peb rhawv ib txuj kev tshab-tshab pub peb ib zag le.

Yog le ntawd, kuv txhad tsi pub muaj tam nyob huv kev xaiv tsaa hab muab nwg ua kom raug cai. Qhov ntawd yog qhov kuv tsi xaav kom leej twg sawv thaiv peb kev. Kuv pum tas lub phaj kws peb yuav tua ntawd nyob dleb heev hab tshwj xeeb kawg nkaus. Yog peb tsi ua

tuab zoo saib, peb yuav moog tsi txug. Tsi taag le ntawd, thaum nov xwb mas leej twg los pum tas nwg yuav zoo heev rua Hmoob tab sis muaj tsawg tug kawg nkaus txhad paub tseeb txug qhov peb xaav tau hab pum txug txuj kev kws yuav moog ncaaj lub phaj.

Yog le ntawd, kuv thov peb txhua leej txhua tug tas yog peb yuav txav txim sab ua dlaab tsi, peb yuav tsum paub hab to taub lub hom phaj kom meej tso. Yog leej twg tsi paub tseeb es laam taug laam has hab laam taug laam ua nwg yuav moog tsi txug lub phaj. Qhov tseeb mas has kom peb paub tas yaam twg tseem ceeb yaam ntawd yuav tsum tau kawm ua ntej txhad ua tau xwb. Yog peb tsi kawm, peb yuav ua moog tsi taug.

Yog le ntawd, kuv thov kom peb tsi has tub txhawj ntxhais ntse, ntxhais txawj tub ntse, zoo nom zoo tswv, quas laug quas hluas, hab quas puj puas yawg suav dlawg yuav tsum sib hlub sib fwm, sib txhawb sib nqaa, sib paab sib puag hab sib ntseeg. Tsi has leej twg, tej tug tsi muaj kev kawm txuj ci sab los puam chawj, yog nwg muaj tswv yim hab lub zeem muag zoo pum dleb paub dlaav moog ncaaj lub hom phaj, peb yuav tsum txaus sab fwm hab txhawb tug ntawd. Peb yuav tsum leeg paub tas peb txawj ntse tag tab sis yog peb tug tswv yim hab lub zeem muag moog tsi ncaaj lub hom phaj tes peb yeej ua tsi tav.

Kuv paub tas peb feem coob xaav tas yog peb ua tsi muaj tam tes yog peb siv raws tsheej tsheem kom saa tab sis tsi yog. Qhov tseeb, tug ntawd los cov ntawd tsi paub lub ntsab xwb. Kuv thov thoob tsib tas qhov suav dlawg xaav ntawd yog tseev tsim kev tswj fwm los yog yaam kws tub muab teeb tau hab ua tav lawm es yug tsuas khaws tswj hab ua lawm xwb. Yaam tshwj xeeb tsi zoo le ntawd. Nwg yog ib txuj kev tshab tshab xeem tuav xeem tawm tho yog peb hloov tuab neeg los yog hloov tswv yim, peb yuav moog tsi txug lub phaj hab yuav muab tsi tau yaam peb ntshaw. Txawm yog koj txawj ntse npawm twg los koj lub zeem muaj tsi ncaaj lub phaj tes yeej tua tsi raug hab ua tsi tav. Qhov tseeb tes yuav tsum yog lub zeem muag ncaaj lub phaj xwb.

Thaum kuv muab thoob tsib taag lawd, kuv xaav tas nyaj mej yuav to taub qhov kuv tsi pum zoo ntawd lawm. Yog peb paub lawm, kuv thov kom peb txhua leej txhua tug sib fwm hab has lug, ib leeg saib taug ib leeg sub peb txhad ua tav qhov peb ntshaw.

Ua tsaug