Kev Sib Txawv Ntawm Ob Lub Teb Chaws
November 6, 2001

Has txug kev ncaaj nceeg, kev hum xeeb hab kev vaam meej nyob America teb hab peb teb chaws.

American yog ib haiv neeg muaj kev ncaaj nceeg tshaaj vim haiv neeg nuav yog ib haiv tuab neeg fwm lij choj. Pev txwv le Yawg Tuam Thawj Clinton cov plaub. Yawg cov plaub ntawd yog zoo le peb teb chaws los yog peb haiv neeg mas kuv ntseeg tas tsi muaj leej twg muaj peev xwm has dlaab tsi rua yawg vim peb teb chaws fwj chim nyob ntawm tug tuab neeg tab sis teb chaws nua fwj chim nyob ntawm tug lij choj.

Peb tsi paub tas tej teeb meem ntawd yog Yawg Clinton teeb meem xwb; tsi taag le ntawd yawg kuj ua tau hauj lwm zoo kawg nkaus rua lub teb chaws tab sis yog vim le caag Congress yuav nrhav txhua txuj kev rau txim yawg thaum pib txug thaum kawg. Qhov ntawd qha tau tas yog luas yuav tsum ua raws lij choj kom tug lij choj muaj peev xwm tswj kev ncaag nceeg rua lub teb chaws. Yog le peb teb peb chaw es muab dlej saib ua ntu muab tuab neeg saib ua plhu es nom tswv txhum tes xuas ncauj txav txim tab sis yog pej xeem txhum tes siv lij choj ces Clinton yeej tsi raug teeb meem dlaab tsi le vim yawg yog huab tais.

Tog kuv has le ntawd los vim peb teb chaws txuj kev coj noj coj ua muab lij choj ua khau rau tab sis teb chaws America siv lij choj ua kaus roog.

Mej yeej paub lawm tas lub teb chaws America tug lij choj yog raab peev xwm hos tug tuab neeg yog tug ua hauj lwm rua lub teb chaws xwb. Tug lij choj yuav tsum tswj kom tau txuj kev ncaaj nceeg. Tug tuab neeg tsi muaj cai hlaa tug lij choj. Yog le ntawd, tsi has nom tswv los pej xeem puav leej

yog tuab neeg xwb. Txhua leej txhua tug yuav tsum nyob huv qaab tug lij choj. Tug lij choj txhad tsi saib dlej ua ntu saib tuab neeg ua plhu. Yog leej twg ua txhum, nom tswv hab pej xeem los puam chawj, tug lij choj muaj peev xwm txav los rau txim taag nrho.

Qhov ntawd yog qhov kws ua rua haiv tuab neeg American muaj kev ncaag nceeg, muaj kev hum xeeb, tau fwj chim sab, tau txais kev muaj yeej, kev thaaj yeeb, kev ywj pheej, kev vaam meej hab muaj meej mom zoo tshaaj. Qhov ntawd yog vim lub teb chaws nuav txhua leej txhua tug siv lij choj ua kaus roog.

Kuv pum tas peb teb chaws tsuas siv lij choj ua khau rau xwb. Lij choj yog ua lug thaiv qhov muag tab sis tsi siv lij choj. Nom tswv yog tug xub tsuj lij choj. Sij hawm pej xeem rhuav, nom tswv txhad has tsi tau. Thaum nom tswv has tsi tau, nom tswv txhad muab lij choj ua khau rua pej xeem txhua tug rau.

Vim peb tsi muaj lij choj tswj kev ncaaj nceeg peb txhad raug poob rua huv txuj kev puam tsuaj puag ntsoog. Qhov kev puam tsuaj puag ntsoog ntawd yog qhov peb yog ib haiv neeg ua neej tsi coj cai, tsi txhawj sib hlub, sib paab, hab sib txhawb sib nqaa.

Peb Hmoob tug cwj pwm ua neej, peb tsuas ua lub neej sib ntaus sib tua hab sib twv sib tawg xwb. Peb nyam tsim kev yeeb ncuab rov rua peb. Yog le ntawd, peb haiv neeg txhad raug poob teb poob chaw.

Qhov kawg, yog peb xaav zoo le luas, kuv pum tas nwg tsi nyuaj luaj twg yog peb leeg paub peb lub neej yuam kev.

Taam sim nuav kev puam tsuaj los peb pum kev vaam meej los peb paub taag lawm. Peb ca le muab tug lij choj coj lug ua kaus roog, coj ncaaj coj nceeg tsi txhob sib twv sib tua, sib cuab sib caws hab sib faib sib cais lawm. Koog zog ua ib paab hab sawv tseeg tuaj ib tog peb yeej yuav tsum txoj tau luas qaab taug tau luas lw xwb.

Ib tsoom Hmoob, peb lug nyob teb chaws America tau ntev tsim nyog kawg lawm. Peb puas txaus sab hab xaav tau tug fwj chim, txuj kev muaj yeej, kev thaaj yeeb, kev ywj pheej, kev vaam meej hab lub meej mom? Yog peb xaav tau, peb txhua leej txhua tug sawv tseeg lug fwm lij choj tes peb qhov kev ntshaw ntawd yuav tsum tseeb xwb.

Ua Tsaug,
Faiv Neeb Vaaj