KEV TXAV TXIM SAB
October 18, 2001

KEV TXAV TXIM SAB MUAJ OB YAAM
1. Yog los yog has tas tsi txhum.
2. Tsi yog los yog has tas txhum.

Yog le ntawd, txhad txhais tau has tas kev txav txim sab tsi yog ib qho yooj yim. Yuav tsum xaav ua ntej maam txav txim sab. Yog leej twg tsi ceev faaj, tug ntawd yuav tau plaub dlub los yog yuav ua tsi tau qhov zoo kws yug xaav kom tau.

Tej laug txeev pev txuj lug has tas “Yuam ruj nqug lug yuam lug nqug tsi lug” hab tej laug pev lug ntxiv tas “Tub txawg dlim chaw muas tub ruag tau plaub dlub”. Tsi taag le ntawd xwb, tseem muaj ib lus has tas “Maam noj maam ntsaig maam xaav maam hais”. Tsi taag le ntawd xwb, tseem has ntxiv tas “nkauj txawg yuam ib koob tub txawg yuam ib lus”.

Tug tub ruag yim has ntau yim tau plaub dlub vim nwg tsi paub hab tsi pum qhov yog, qhov zoo, qhov meej hab qhov tseeb tes laam taug laam has txhad tau plaub dlub.

Tug txawj ntse mas nwg paub dleb pum dlaav nwg xaav zoo-zoo ua ntej maam ua. Yog tug tswv yim tig ceev mas luas has poob nthaav xwb nwg yeej paub qhov yog hab tsi yog taam sim ntawd lawm. Nwg muaj peev xwm teb kag taam sim ntawd tau le lub sab xaav. Tsi taag le ntawd xwb, luas has ntau los nwg muab ua tau

tsawg. Luas has ib phaab nwg muab ua tau ib lus xwb. Yog le ntawd, nwg txuj kev txav txim sab txhad yog dlua hab meej tshaaj. Nwg txuj kev txawj ntse txhad ua rau nwg dlim chaw muas. Tab sis nwg yuav tsum ceev faaj. Yog nwg tsi ceev faaj, nwg tseem yuam kev. Yog le ntawd, txhad pev lug has tas “nkauj txawg yuam ib koob tub txawg yuam ib lus.

KEV TXAV TXIM SAB SIB TXAWV YOG LUG NTAWM PLAUB HOM NEEG
1. Tug txawj
2. Tug ntse
3. Tug ruag
4. Tug txawj ntse

NQAI IB, HAS TXUG TUG TXAWJ
Tug txawj mas nwg tsuas txav txim sab tau raws le nwg tau paub, tau pum, tau ua, tau nov, hab tau kawm lug lawd xwb. Yaam txawv nwg kuj tsi paub tab sis yog yaam nwg twb kawm taag es nwg paub lawd mas nwg ua tau zoo heev. Qhov nuav yog vim nwg txuj kev txawj.

NQAI OB, HAS TXUG TUG NTSE
Tug ntse mas muaj tswv yim heev. Nwg pum dleb paub dlaav. Yaam twb muaj lawm los nwg paub, yaam tsi tau tshwm sim los nwg paub. Qhov phem qhov zoo qhov yog hab tsi yog los nwg yeej paub. Nwg txawj muab luj kom meej, kom ntshaab, kom yog, kom hum, kom dlhos, kom tseeb hab kom raug lawm nwg le txav txim sab. Yog le ntawd, thaum twg tug tuab neeg ntse tau has lawm mas feem ntau yeej raug xwb. Tsi taag le ntawd, nwg tug tswv yim los tig sai heev tab sis hos yog siv le tug txawj nwg kuj ua tsi tau taag vim nwg has tau tab sis ua tsi tav. Tej yaam nuav yuav tau siv ntaub ntawv hab siv twj siv teg siv taw ua txhad tau.

NQAI PEB, HAS TXUG TUG RUAG
Tug ruag mas tsuas txav txim sab tau rau phaab kev ua noj ua haus hab tej hauj lwm huv vaaj huv tsev xwb. Has txug kev coj noj coj ua, kev plaub kev ntug tes nwg tsuas tog tug txawj ntse saib nwg txav txim sab le caag tes ua le ntawd xwb vim nwg tsi pum txuj cai.

NQAI PLAUB, HAS TXUG TUG TXAWJ NTSE

Tug txawj ntse mas nwg txuj kev txav txim sab muaj nqes sab tshaaj plawg vim nwg muaj peev xwm ua tau ib puas tsaav yaam. Yaam twg los puam chawj, yog nwg xaav tau nwg yeej ua tau, tsi has kev tswj fwm, coj noj coj ua, kev plaub ntug, kev ua noj ua haus, kev saib miv tub miv nyuas, kev laag luam los yog lwm yaam. Nwg txuj kev txawj ntse ua rau nwg xaav tau sai hab ua tau yooj yim. Nwg kawm tsawg ua tau ntau. Tug txawj ntse txuj kev kawm yuav muaj nuj nqes tshaaj tug txawj vim tas nwg yeej muaj peev xwm ua tau ib puas tsaav yaam. Nwg txuj kev txawj ntse ua rau nwg xaav tau sai hab ua tau yooj yim. Tug txawj ntse txuj kev kawm yuav muaj nuj nqes tshaaj tug txawj vim tas nwg yeej tsi vaam kom lwm tug lawm. Tsi taag le ntawd xwb, tsi yog tas nwg ua tau tej nwg tau kawm lawd xwb, nwg tseem muaj cuab kaav nrhav tau yaam tshab ntau-ntau npaug ntxiv rau.

Kev txav txim sab yog ib qho tseem ceeb kawg nkaus. Yog koj txav txim sab tau qhov yog tes koj tau kev thaaj yeeb hab vaam meej tab sis yog koj txav txim sab tau qhov tsi yog tes koj poob nteeg hab tau kev tsaus ntuj ntaag. Yog le ntawd, ua dlaab tsi txhad yuav tau saib tseeb tag-tag pum tas yog lawm maam ua.

Tshuav ib qhov kev txav txim sab kws meej tshaaj plawg yog...yuav tsum sib tuav xaam ua ke kom muaj ntau tug pum tas zoo, meej hab tseeb lawm tag maam txav txim sab muab tug tswv yim kws suav dlawg pum zoo ntawd coj moog siv. Qhov nuav yog yaam zoo hab muaj nqes tshaaj plawg nyob huv txuj kev txav txim sab.

Lub teb chaws twg muaj tuab neeg txawj ntse coob, txav txim sab yog, ua tau zoo, coj tau ncaaj, txawj teeb hom phaj, paub siv tug peev xwm ua txhua yaam kom tav, lub teb chaws ntawd muaj kev vaam meej sab hab thaaj yeeb tshaaj.

TXUJ KEV TXAV TXIM SAB NTAWM YUG TUG KHEEJ MUAJ OB YAAM
1. Ncaaj los tau
2. Nkhaus los tau

Txawm yog cov tuab neeg ntse los muaj ib feem yeej coj nkhaus. Tsi taag le ntawd xwb, cov ruag los muaj ib feem kuj nkhaus kawg.

NUJ NQES NTAWM TXUJ KEV TXAV TXIM SAB UA TUAB NEEG NCAAJ HAB NKHAUS
1. Yog tug ntse ncaaj nrug tug ntse nkhaus, tug nkhaus
yuav tsum swb.
2__ Yog tug ruag ncaaj nrug tug ruag nkhaus, tug ruag nkhaus yuav
tsum swb.
3__ Yog tug ntse ncaaj nrug tug ruag nkhaus, tug ruag nkaus swb
yooj yim heev.
4. Tug ntse nkhaus nrug tug ruag ncaaj, ntau zag tug ruag ncaaj
kuj swb vim nwg lug ntawm Hmoob lu lug has tas “noj tsi taug
yuav tuag, has tsi taug yuav swb”. Qhov nuav yog lug ntawm
Hmoob tug cwj pwm saib dlej ua ntu saib tuab neeg ua plhu.
5__ Tug ntse ncaaj nrug tug ntse ncaaj mas muaj plaub tsawg
heev. Yog muaj los yeej has yooj yim dlua vim txuj kev sib to
taub hab txawj sib zaam, sib yoog, sib fwm.
6. Tug ruag ncaaj nrug tug ruag ncaaj tes tsi muaj plaub hlo le.
7. Tug ruag nkhaus nrug tug ruag nkhaus mas tsi muaj tug yeej
tug swb le vim ob tug tsi pum txuj cai tab sis tog twg los xaav
ua tug yeej xwb. Ruag nkhaus nrug ruag nkhaus mas muaj
plaub tshaaj plawg.

Tug tuab neeg phem es ntse nkhaus nwg coj tsi tau pej xeem fuab fwm. Tug tuab neeg zoo hab ntse ncaaj txhad yog tug thawj coj ntawm pej xeem fuab fwm.

Yog le ntawd, peb txhua leej txhua tug yuav tau ceev faaj vim txuj kev txav txim sab yog ib qho tsi yooj yim. Yog koj yuam lug lawm tes yeej txhum le lawm, tsi zoo le moog kev es moog yuam kev lawm los yug rov qaab pauv tau. Yog le ntawd, tej laug txhad has tas “yuam ruj nqug lug, yuam lug nqug tsi lug.”

Has txug kev txav txim sab yaam dlaav- dlaav tes tsuas muaj le has lug sau toj ntawd xwb tab sis tshuav ib yaam kev txav txim sab tsaj xeeb tshaaj plawg kws yog qhov yug txaus sab muab yug tug kheej fij rua txuj kev txav txim sab has tas yug txawm yuav caj yuav tuag los puam chawj tsuav nwg muaj nuj nqes rua yug tsev tuab neeg, yug cuab kwv tij, yug haiv neeg hab yug lub teb chaws xwb.

Txuj kev txav txim sab ntawd yog qhov yeej hab swb kag ntaag. Qhov kev txav txim sab ntawd tsi yog yooj yim, txawm yog ib haiv neeg los muaj tsawg tug kawg nkaus txhad ua tau xwb. Yog leej twg ua tau, yog swb, tug ntawd yuav raug tuag tab sis yog yeej, nwg yuav tau txais lub meej mom sab kawg nkaus.

Faiv Neeb Vaaj