KEV TSHAWB TXUG KEV UA NEEJ
September 20, 2001

Attack on America September 11, 2001 yog ib yaam luj kawg nkaus rua kuv kawm txug Hmoob lub neej.

Kuv pum tseeb hab paub zoo has tas yog vim le caag lub teb chaws America txhad nyob ruaj khov, vaam meej, thaaj yeeb, muaj yeej, muaj meej mom, hab tug fwj chim sab tshaaj txhua lub teb chaws nyob huv qaab ntuj.

Thaum xwm txheej tshwm sim taag, kuv pum tas:
1. Pej xeem hlub puab lub teb chaws heev
2. Txhua tug pej xeem muaj dlej sab hlub puab haiv neeg tag-tag
3. Tseem fwv hlub lub teb chaws, tug fwj chim, hab nwg cov pej xeem kawg nkaus
Peb (3) yaam sau nuav yog ib tug yaam ntxwv qha rua kuv has tas tug cwj pwm muaj teb muaj chaws yog zoo le caag tag.

Kuv muab qha kom ntxawg zog sub peb txhad paub tas yog le caag
Tom qaab teeb meem tshwm sim, txhua tug tuab neeg America quaj lub kua muag poob. Qhov ntawd qha rua kuv tas:
1. Puab hlub puab lub teb chaws kawg nkaus.
2. Puab hlub puab cov tuab neeg kws raug xwm txheej heev.
3. Puab ntshai heev has tas tsaam teeb meem tsi tau taag.

Ib qho tseem ceeb kws tau qha has tas puab sib hlub npaum le caag yog qhov puab tau tuam yeem rhu roj rhu ntshaav hab tawm nyaj txag moog paab moog cawm cov raug xwm txheej.

Tsi taag le ntawd, sij hawm tug thawj ntawm lub teb chaws has tuab lu lug has tas, “nub nua peb sib koom sab thov ntuj paab peb lub teb chaws hab peb cov tuab neeg

raug xwm txheej”, xwb mas txhua tug pej xeem huv lub teb chaws yeej koom teg taag nrho.

Txhua yaam kuv has lug sau nuav qha tau meej kawg nkaus has tas puab txhad yog ib haiv neeg sib hlub, sib paab, sib fwm, hab nyob hum xeeb tag.

Tsi taag le ntawd, kuv pum tas tseem fwv los hlub nwg lub teb chaws, tug fwj chim hab tsoom pej xeem kawg nkaus. Thaum twg lub teb chaws raug teeb meem, nom tswv txhua faab tsi has paab twg pawg twg koom teg taag nrho sib paab sib txheem tshawb kom tau tug teeb meem hab tshem kom tawm taam sim. Tsi taag le ntawd, puab sib koom ua ib lub sab tawm nyaj txag moog siv dlaws tug teeb meem yaam tsi muaj leej twg khib le. Puab tsi muab kev khib, kev ntshaw, hab kev chim lug sib twv sib nyom. Ib yaam le qhov kws Tuam Thawj Bush has kom Congress tawm suab tso $20,000,000,000 moog siv tab sis taag nrho cov nom tswv huv Congress tawm ib lub suab has tas yuav tsum tso $20,000,000,000 ntxiv qhov Tuam Thawj Bush has es ua $40,000,000,000. Mej saib, tom qaab cov xwm txheej huv New York hab Washington DC tshwm sim taag nrho, ob paab nom tswv sawv cev pej xeem huv Congress muab kev pum zoo tawm nyaj txag paab yawg Tuam Thawj Bush zoo le caag. Puab siv 3 nub txav txim sab xwb. Puab txhua tug nom tswv koom ua ib lub sab ua kom hauj lwm tav. Kev pum zoo, nyob huv House of Representative yog 420-1, nyob huv Senate yog 98-0. Taag nrho ob lub tsev, muaj 519 leeg. Muaj tuab leeg tsi txav txim sab xwb. Kuv pum tas sij hawm tsi muaj teeb meem mas puab ua hauj lwm le ob paab tab sis yog lub teb chaws muaj teeb meem mas puab ua le ib paab xwb. Tuab lub sij hawm ntawd, yawg Gephardt, D-MO, tug Tuam Thawj lub House of Representative tau tawm lug has tas “In this Congress we are shoulder to shoulder,” “We will act together as one”. Lub ntsab lug Gephardt has ntawd qha meej kawg nkaus has tas American ua neej raws nraim puab lu lug cog tseg tim ntsej tim muag puab tug chij has tas “One Nation Under God”. Qhov ntawd yog qhov kuv has tas yug yuav tsum hlub yug lub teb chaws tshaaj yug hlub yug haiv neeg, yug hlub yug haiv neeg tshaaj yug hlub yug tug kheej.

American tug cwj pwm sib tw ua nom ua tswv los tuab yaam. Sij hawm puab taab tom sib tw mas peb xaav tas puab yuav tsum ua yeeb ncuab xwb tab sis qhov tseeb yog puab nthuav kev txawj ntse qha pej xeem kom pej xeem paub txav txim sab xaiv xwb. Thaum ib tug yeej lawm, lwm tug tsuas sawv lug txhawb hab qhuas xwb. Dlhau le ntawd, tug swb los ca le moog nyob ua ib tug pej xeem zoo fwm tug yeej le lawm. Qhov ntawd qha tau tseeb hab meej kawg nkaus has tas haiv neeg America txhad yog ib haiv neeg ua neej sib tw hab tseem-tseem yog ib haiv neeg tsim nyog muaj teb muaj chaw tag.

Kuv pum tas zag nuav yeeb ncuab noj nyoog haus txag npaaj tswv yim siv tom txwv tua kom pej xeem America rov sib ntaus sib tua tab sis vim tuab neeg America nyob hum xeeb, muaj kev koom teg hab ncaaj nceeg rua puab lub teb chaws heev. yeeb ncuab txhad tsi muaj peev xwm ntxag tau pej xeem fuab fwm. Yog le ntawd, yeeb ncuab txhad muab nwg roj kib nwg txhaav. Nwg siv nwg cov tuab neeg ua tom txwv tsim txom teb chaws America xis le cov xwm txheej lub 9-11-01 kws yeeb ncuab tsaav nyuab hoom tsoo ob lub tsev nyob huv New York (World Trade Center) hab tsoo ib lub tsev nyob huv Washington DC (Pentagon).

Yeeb ncuab noj nyoog lub tom txwv yog qhov yeeb ncuab tso nwg cov tuab neeg tuaj peem tsheej ua tuab neeg America, kawm txuj ci America hab soj kom tau tug caag ntawm lub teb chaws nwg maam teeb hom phaj ua txag-txag kom lub hauv paug puam tsuaj zoo le cov xwm txheej 9-11-01.

Yeeb ncuab tug tswv yim ntawd yog tas America coj cwj pwm zoo le peb Hmoob tes zag nuav yeeb ncuab yeej muab nyaj muag tau cov nom tswv ib feem ntxeev sab tsim kev sib tawg sawv sib ntaus sib tua lawm. Tsi taag le ntawd, tej zag tseem nteg tau peb tug Tuam Thawj rua yeeb ncuab hab.

Ib yaam le kuv tub qha mej ntau zag lawm has tas Hmoob muaj 4 tug cwj pwm tsi zoo ua ib tug yum sij qheb qhov rooj rua yeeb ncuab tsim txom Hmoob xis le:
1. Ntshaw nyaj tau dlawb
2. Ntshaw nom
3. Ntseeg tug saab nrau tshaaj tug huv
4. Ua neej sib twv.
Mej yeej paub lawm tas txhua tam nom tswv nyob huv Hmoob lub neej puav leej yog yeeb ncuab muab nyaj xoov hab muab nom xyeev es Hmoob rov taw tuam ntuj tua nom tua tswv tua faaj tim huab tais Hmoob dlaim aav txhad poob lawm.

Thaum kuv pum cov xwm txheej ntawd tshwm sim taag nrho, kuv muab peb Hmoob lub neej txij xyoo 3000 BC txug xyoo 2000 AD coj lub xaav. Kuv xaav txug peb txuj kev ua neej sib twv hab sib tawg ua rua Hmoob poob teb poob chaw ua ntsuag moog nyob thoob qaab ntuj mas nwg ua rua kuv lub kua muag poob. Qhov kuv lub kua muag poob yog vim kuv xaav has tas caag tam nuav kuv yug txhum lug ua Hmoob kws yog ib haiv neeg tsi txawj sib hlub. Kuv xaav tas yog peb Hmoob txawj sib hlub sib paab hab nyob hum xeeb sib fwm le haiv neeg America, ntshai hmoob tseem muaj teb muaj chaw hab tseem muaj fwj chim.

Ib zeej tsoom Hmoob! Yog txhua tug paub hab pum le kuv has, thov peb Hmoob muab khaws nkaus tso rua nruab sab es tig lug peb sib hlub, sib paab, sib txhawb, sib nqaa es tso plhuav txuj kev sib twv, sib tawg tseg nyob hum xeeb saib peb puas rais rov moog tsheej ib haiv neeg dlua.

Ua Tsaug,
Faiv Neeb Vaaj